TANROADS FANYENI KAZI KWA USHIRIKIANO

DODOMA

14/02/2024

Mtendaji Mkuu wa Wakala ya Barabara Nchini (TANROADS), Mhandisi Mohamed Besta, ambaye pia ni Mwenyekiti wa Baraza la wafanyakazi amewataka watumishi wa wakala huo kuendelea  kufanya kazi kwa ushirikiano baina yao ili kuleta tija na ufanisi kwa Wakala huo.

Mhandisi Besta amezungumza hayo Februari 13, 2024 wakati akifungua Mkutano wa 19 wa Baraza la wafanyakazi lililofanyika jijini Dodoma.

“Nawaomba tuendelee kufanyakazi kwa pamoja kama ndugu kwa sababu sisi ni familia moja na kazini ni sehemu ambayo inatakiwa iwe na upendo ili  kuweza kusaidiana katika kutatua changamoto za kazi na hata za kijamii”, amesema Mhandisi Besta.

Vilevile amewapongeza Watumishi wa Wakala huo kwa muda mchache aliokaa na amepata ushirikiano wa kutosha kutoka katika Timu ya TANROADS ambayo inafanyakazi kwa kutegemea Weledi, Utu na Undugu.

Aidha, ameushukuru Uongozi wa Wizara ya                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                            Ujenzi ambao ni waongoza sera kwa kuendelea kufanya nao kazi kwa ukaribu na kwa ushirikiano ili kuhakikisha malengo ambayo yamewekwa yanafikiwa na yanatekelezeka.

Ameongeza kwa kuipongeza Serikali ya Awamu ya Sita chini ya Rais Dkt Samia Suluhu Hassan, kwa kutoa kibali cha kuweza kuajiri zaidi ya Watumishi  2400  ambao walikuwa wakifanyakazi kwa mkataba katika taasisi hiyo.

“Kipindi naingia Taasisi yetu ilikuwa na wafanyakazi Takribani 755  ambao walikuwa wameajiriwa ajira za kudumu na wengine zaidi ya  2000  walikuwa wameajiriwa ajira za Mkataba,  Uongozi umefanya juhudi na sasa wafanyakazi wote waliokuwa kwenye ajira za mikataba, wamepata ajira za kudumu",  aliongezea Besta.

Pia ameeleza kuwa Wakala unaendelea kuboresha maslahi kwa jinsi hali itakavyokuwa nzuri wataweza kuendelea kutoa ajira kwa kuzingatia uchumi wa Nchi.

Mkutano wa  19  wa Baraza la Wafanyakazi,  unafanyika Dodoma kwa Siku 2 na kushirikisha zaidi ya wajumbe 100 kutoka Mikoa yote ya Tanzania.