UJENZI WA MAKALAVATI SABA KILIMANJARO WAENDELEA KWA KASI, WAZIRI ULEGA ARIDHISHWA

Kilimanjaro, 29 Novemba 2025

Waziri wa Ujenzi, Mhe. Abdallah Ulega, amepongeza kasi na ubora wa ujenzi wa makalavati makubwa saba yanayotekelezwa katika Barabara Kuu ya Dar es Salaam–Moshi–Arusha, miradi ambayo ni sehemu ya kazi za dharura kutokana na athari za mvua kali za El-Niño.

Akiwa kwenye ziara ya kukagua maendeleo ya ujenzi huo, Mhe. Ulega alisema ameridhishwa na usimamizi unaofanywa na TANROADS mkoa wa Kilimanjaro pamoja na mkandarasi mzawa Kings Builders, akisisitiza kuwa mradi huo ukamilike ndani ya muda uliopangwa ifikapo Desemba 2025.

“Nimeridhishwa na kazi inavyokwenda. Hakikisheni mradi unamalizika kwa wakati, na msisahau kufunga taa za barabarani ili zisaidie mwanga, wananchi waendelee na shughuli zao za kujiongezea kipato,” alisema Mhe. Ulega.

Waziri huyo pia alimwelekeza Meneja wa TANROADS Kilimanjaro, Mhandisi Motta Kyando, kuhakikisha barabara hiyo inakuwa na vituo rasmi vya magari kusimama, maeneo ya bodaboda pamoja na barabara za watembea kwa miguu ili kuongeza usalama na urahisi wa matumizi.

Awali, Mkuu wa Mkoa wa Kilimanjaro, Mhe. Nurdin Babu, alimshukuru Rais wa Awamu ya Sita kwa kuendelea kuboresha miundombinu ambayo inarahisisha usafiri na kuongeza usalama wa wananchi. Aliongeza kuwa wamewasiliana na Kiwanda cha Sukari cha TPC ili kuleta mitambo ya kusafisha mto na kuondoa vizuizi vya maji kabla ya msimu wa mvua kuanza.

Katika taarifa ya utekelezaji, Meneja wa TANROADS Mhandisi Motta Kyando alisema mradi huo unahusisha ujenzi wa maboksi kalavati saba na kuinua tuta katika maeneo ya Himo na Hai, ambako miundombinu ya awali ilikuwa imezidiwa na maji.

Amesema eneo la Kileo lina makalavati yenye vipimo vya mita 5 kwa 2.5 na kuinua tuta kwa mita 1.5 katika kipande cha Km 1.6, huku katika eneo la Kwa Msomali (Hai) makalavati yakiwa na upana wa mita 4 kwa 1.2 pamoja na tuta la mita 1.5 kwa Km 2.225.

Mradi huo unadhaminiwa na Benki ya Dunia kwa gharama ya Sh bilioni 6.8 na hadi sasa umefikia asilimia 76 ya utekelezaji, licha ya mkandarasi kukumbana na changamoto za mashine kuzama kwenye tope kutokana na unyevunyevu wa eneo hilo.

“Makalavati yote saba yamekamilika, tumeinua tuta na sasa tunaweka tabaka la pili la changarawe na saruji. Baada ya hapo tutaweka mawe yaliyosagwa kabla ya kufunga lami,” alisema Mhandisi Kyando.

Mbunge wa Vunjo, Mhe. Enock Koola, alishukuru serikali kwa kutekeleza ahadi zake ndani ya kipindi kifupi, akisema: “Wananchi wanaona kazi inayoendelea. Serikali imesimama imara kuhakikisha barabara zinajengwa kwa ubora na kwa wakati.”