MHANDISI EMIL ZENGO

Lindi

06/07/2025

MKATABA WA UJENZI WA BARABARA YA LIWALE–CHOYA WASAINIWA, TANROADS YAENDELEA KUTEKELEZA MAELEKEZO YA SERIKALI

Meneja wa Wakala wa Barabara Tanzania (TANROADS) Mkoa wa Lindi, Mhandisi Emil Zengo, amesaini rasmi Mkataba wa Ujenzi wa kiwango cha lami wa kipande cha barabara ya Nangurukuru–Liwale, chenye urefu wa kilomita 10 kutoka Liwale hadi Choya. Mkataba huo una thamani ya shilingi bilioni 16.4 na umetolewa kwa kampuni ya kizalendo ya M/s Ansil (T) Limited kwa kushirikiana na M/s Hamier (T) Limited.

Hafla ya utiaji saini imefanyika tarehe 5 Julai, 2025 katika ofisi ndogo za TANROADS zilizopo Njia Nne, Lindi, na kuhudhuriwa na timu ya wataalamu kutoka TANROADS Mkoa wa Lindi.

Akizungumza mara baada ya tukio hilo, Mhandisi Emil Zengo aliishukuru Serikali ya Awamu ya Sita inayoongozwa na Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, kwa kuendelea kutoa fedha nyingi kwa ajili ya miradi ya barabara mkoani Lindi. Alieleza kuwa Serikali tayari imetoa fedha kwa ajili ya ujenzi wa madaraja makubwa 13 pamoja na barabara kuu za Nanganga–Ruangwa, Nachingwea–Ruangwa, na Ruangwa–Namichiga—all zikiwa katika kiwango cha lami.

Aidha, Mhandisi Zengo aliwataka wananchi wa Mkoa wa Lindi kuendelea kuunga mkono juhudi za maendeleo zinazofanywa na Serikali ya Mheshimiwa Rais Dkt. Samia Suluhu Hassan, kwa kushiriki kikamilifu katika ulinzi wa miundombinu, kutoa ushirikiano kwa wakandarasi na kuendelea kuwa mabalozi wa maendeleo katika jamii zao.