KASEKENYA AWATAKA WAKANDARASI BARABARA YA MNIVATA – NEWALA –MASASI KUONGEZA KASI

Masasi

13 Septemba,2024

Naibu Waziri wa Ujenzi, Mhandisi, Godfrey Kasekenya amewataka Wakandarasi China Wu Yi na Ms China Communication wanaojenga barabara ya Mnivata- Newala – Masasi (Km 160) kwa kiwango cha lami  kuhakikisha wanajenga barabara hiyo kwa ubora uliuokusudiwa na kukamilika kwa wakati.

Akizungumza wakati alipokagua barabara hiyo Septemba 13, 2024 mkoani  Mtwara  Naibu Waziri huyo amesema kuwa kukamilika kwa barabara hiyo kutafungua uchumi wa Mkoa huo na kuwasisitiza wakazi wa Mtwara kuongeza kasi ya uzalishaji wa mazao ya chakula na biashara.

“Serikali imedhamiria kuhakikisha ujenzi wa barabara hii unakamilika kwa wakati, hivyo ujenzi huu umegawanywa katika sehemu mbili, Mnivata- Mitesa (Km 100) ambayo inajengwa na Mkandarasi China Wu Yi na Mitesa – Masasi (Km 60) inayojengwa na Mkandarasi Ms China Communication lengo likiwa kuharakisha ujenzi huu ili kuwawezesha wananchi wa Mtwara kunufaika”, amesema Mhandisi Kasekenya.

Ametoa rai kwa wananchi watakaopata kazi katika mradi huo kufanya kazi kwa bidii na kuulinda kwa kujiepusha na vitendo vya wizi na kusisitiza umuhimu wa Wakandarasi hao kutoa fursa za ajira kwa wananchi waishio jirani na mradi huo kadri inavyowezekana.

Katika hatua nyingine Naibu Waziri Kasekenya amekagua maandalizi ya ujenzi wa barabara ya Mang’amba – Msimbati (Km 35) na Madimba – Kilambo (Km 16) ambazo usanifu wa kina wa ujenzi wake kwa kiwango cha lami umekamilika na Serikali ipo katika maandalizi ya mwisho ya kupata Mkandarasi atakayejenga barabara hizo.

Aidha, amekagua eneo litakapojengwa daraja la Kilambo litakalounganisha Tanzania na Msumbiji kwa njia fupi na hivyo kukuza uchumi wa Mkoa wa Mtwara na jimbo la Cabo Delgado nchini Msumbiji.

Kadhalika, Kasekenya amemuagiza Kaimu Meneja wa Wakala wa Ufundi na Umeme (TEMESA) Mkoa wa Mtwara, Dhulkifu Hamdan kuhakikisha ndani ya kipindi cha siku 10 kivuko cha Kilambo kinarejea kutoka katika matengenezo na kuendelea kutoa huduma kwenye eneo la Kilambo mkoani humo.

Kwa upande wake, Meneja wa Wakala wa Barabara Tanzania  (TANROADS), Mkoa wa Mtwara, Mhandisi, Dotto John amesema mkoa huo wamejipanga kuhakikisha barabara zote zinazojengwa zinasimamiwa kikamilifu, ili thamani ya fedha iwiane na ubora.

Naibu Waziri Kasekenya anaendelea na ziara yake ya siku tano katika mikoa ya Lindi na Mtwara, ambapo anakagua miundombinu ya barabara na madaraja.